Descobrissètz
una òbra poetica
Despuèi qu’escriu, dès 1989, Franc Bardòu a bastit una òbra poetica e, accessòriament, prosaïca pro consequenta, de ja mai d’un trentenat de libres publicats. Sa lenga es l’occitan, non pas dins qualque fòrma localista, dins la fòrma universalista e resolgudament modèrna qu’es l’estandard de l’Academia Occitana, mas una granda partida de sas creacions es disponibla tanben dins una traduccion en francés estandard. Sas referéncias, misticas (gnosticas o alquimicas segon lo periòdi), eroticas (Trobadors) e politicas, coma sas tematicas son multiplas.
Còp de còr de l’autor
« Cosmogonia » es la fruita poëtica d’un escambi espistolari amistós, mas argumentat e pro long, entre lo fisician Andrieu Lanas e lo poèta Franc Bardòu. L’intencion iniciala dels dos autors èra d’alestir un tractat a l’encòp scientific e metafisic que faguèsse lo punt de las coneissenças de uèi.
Mièlhs val morir depès butant contra l’auratge que colcats coma cans al pè de la mestralha.
Franc Bardòu
Qualques mots sus l’autor
Franc Bardòu
Franc BARDÒU, nascut a Tolosa en 1965, ensenhant, poèta e fotografe, escriu en occitan despuèi 1989, e collabòra a la revista Òc. Es estat cap-redactor de la revista Lo Gai Saber de 2011 a 2018.
Autor d’una tèsi de doctorat subre l’òbra e la pensada de’N Renat NELLI (1907-1982), Prèmi Godelin 2011 de l’Academia del Lengadòc per l’ensemble de son òbra poëtica, es membre de l’Academia dels Jòcs Florals de Tolosa, tant coma de l’Academia Occitana, e correspondent permanent de l’Academia Aranesa dera Lenga Occitana.
